በዩኒቨርሲቲው ፕሬዚዳንት እና ምክትል ፕሬዚዳንቶች መካካል የአፈፃፀም ውል ስምምነት መርሃ ግብር ተካሄደ

የደባርቅ ዩኒቨርስቲ ካውንስል አባላት በተገኙበት ትላንት ጥር 08/2017 ዓ.ም በፕሬዚዳንቶች መካካል የአፈፃፀም ውል ስምምነት የፊርማ ስነ-ስርዓት እና የ2017 በጀት ዓመት አጋማሽ ዓመት ስራ አፈፃፀም ሪፖርት ግምገማ ተካሄደ::

መርሃ-ግብሩን በንግግር ያስጀመሩት የዩኒቨርሲቲው ተ/ፕሬዚዳንት ዶ/ር አስማማው ዘገዬ ዛሬ ከምክትል ፕሬዚዳንቶች ጋር የሚፈረመው የአፈፃፀም ውል ዩኒቨርስቲው ታህሳስ 16/2017 ዓ/ም ከትምህርት ሚኒስቴር ጋር  የተወሰደው የውል ስምምነትን መሰረት አድርጎ የተዘጋጀ መሆኑን ጠቅሰው  የአፈፃፀም ውሉ ዩኒቨርስቲው በሀገራዊና ዓለም አቀፋዊ የከፍተኛ ትምህርት ተቋማት ቁልፍ የአፈፃፀም መለኪያዎች አንፃር  ተቋሙ በመማር ማስተማር፣ምርምር፣ ቴክኖሎጅ ሽግግርና ማህበረሰብ አገልግሎት ተልዕኮውን በመወጣት ሂደት ውስጥ የተግባር አፈፃፀምን በመለካት  ውጤታማነትን ለማረጋገጥና ተጠያቂነትን ለማስፈን የሚያስችል እንደሆነ ገልፀዋል፡፡ በተወሰደው የውል ስምምነት መሰረት በቀጣይ በምክትል ፕሬዚደንቶች እና በየዘርፉ ከሚገኙ ስራ ኃላፊዎች ጋር ስምምነት እንደሚደረግ ዶ/ር አስማማው አክለው ገልፀዋል፡፡

በዕለቱ የውል ስምምነት የወሰዱት የአካ/ም/ቴክ/ሽግ/ማ/አገ/ ተወካይ ም/ል ፕሬዚዳንት ዶ/ር ጋሻው ግስሙ በበኩላቸው የዘርፋቸውን የቁልፍ አፈፃፀም አመላካቾችን ለማሳካት ዝግጁ መሆናቸውን ገልፀው በቀጣይ በዘርፉ በየደረጃው ከሚገኙ ዲኖች እና ዳይሬክተሮች ጋር የአፈፃፀም ውል እንደሚፈራረሙ ገልጸዋል።

የፊርማ ስነ-ስርዓቱ ከመካሄዱ በፊት የስምምነት ሰነዱ ይዘት በስተራቴጅክ ጉዳዮች ስራ አስፈፃሚ በአቶ አወቀ አዛናው አማካኝነት ለታዳሚዎች ግልፅ ተደርጎ ሰፊ ውይይት የተደረገ ሲሆን በተመሳሳይ ሁኔታ የበጀት ዓመቱ አጋማሽ ዓመት ስራ አፈፃፀም ሪፖርት ቀርቦ ተግምግሟል፡፡

ጥር 9/2017 ዓ/ም
የህዝብና አለም አቀፍ ግንኙኘት ስራ አስፈፃሚ

***
በ2017 ዓ.ም በአቅም ማሻሻያ (ሪሚዲያል)  ፕሮግራም በትምህርት ሚኒስትር አማካኝነት በደባርቅ ዩኒቨርሲቲ ለተመደባችሁ ተማሪዎች በሙሉ፦

ምዝገባ የሚካሔደው ጥር 29-30/2017 ዓ.ም እና በቅጣት ምዝገባ የካቲት 1/2017 ዓ/ም መሆኑን አውቃችሁ ለምዝገባ ስትመጡ ከ8ኛ ክፍል ጀምሮ ያሉ የትምህርት ማስረጃዎች እንዲሁም ብርድ ልብስ፣ አንሶላ እና ትራስ ጨርቅ መያዝ እንደሚጠበቅባችሁ ዩኒቨርሲቲው ያሳስባል። 

ታህሳስ 30/2017 ዓ/ም
የህዝብና አለም አቀፍ ግንኙነት ስራ አስፈፃሚ

ደባርቅ ዩኒቨርሲቲ የግዕዝ ቋንቋ እና የብራና ፅሁፍ አውደ ርዕይ አካሄደ

በደባርቅ ዩኒቨርሲቲ ሀገር በቀል ዕውቀት ማስተባበሪያ ጽ/ቤት አዘጋጅነት፤የዩኒቨርሲቲው ማህበረሰብ እና ከደባርቅ ከተማ አስተዳደር አብያተ ክርስቲያናት ጥሪ የተደረገላቸው የቅኔ መምህራን በተገኙበት ትላንት ታህሳስ 24/2017 ዓ.ም የግዕዝ ቋንቋ እና የብራና ፅሁፍ አውደርዕይ ተካሄደ፡፡

አውደርዕዩን በመክፈቻ ንግግር ያስጀመሩት የፕሬዚዳንት ጽ/ቤት ኃላፊ እና የአካ/ምር/ማ/ሰብ/አገ/ቴክ/ሽግ/ተ/ም/ፕሬዚዳንት ጋሻው ግስሙ (ዶ/ር) አላማው ለግዕዝ ቋንቋ ተገቢ ትኩረት በመስጠት ቋንቋው በውስጡ የያዘውን ሀገር በቀል ዕውቀት ትውልዱ እንዲጠቀምበት ለማስቻል መሆኑን ገልፀዋል፡፡ ዶ/ር ጋሻው አያያዘውም ዩኒቨርሲቲው በሂደት የግዕዝ ቋንቋ ትምህርት ለመጀመር እየሰራ መሆኑ እንደተጠበቀ ሆኖ በቅርቡ በቅዳሜ እና እሁድ እስከ ሶስት ወራት የሚዘልቅ የአጭር ጊዜ የግዕዝ ቋንቋ ስልጠና መስጠት የሚጀምር መሆኑን አብስረዋል፡፡

በመርሃ-ግብሩ በጎንደር ዩኒቨርሲቲ የግዕዝ ቋንቋ መ/ር ፀዳሉ አዲሱ እና የጎንደር የብራና ፅሁፍና ምርምር ማዕከል ስራ አስኬጅና የስነ መለኮት ምሩቅ መ/ር ግዛቸው ጥጋብ ጥናታዊ ፅሁፍ ማቅረባቸው ታውቋል፡፡ በመምህር ፀዳሉ አዲሱ “የማህበረ ቅኔ ውይይት” በሚል መነሻ ሀሳብ የቀረበው ጥናታዊ ፅሁፍ ውጤታማ የሆነው የግዕዝ ቋንቋን የማስተማር ስነ-ዘዴ በዘመናዊ የመማር-ማስተማር ስርዓቱም ተግባራዊ ቢደረግ አዋጭነት እንዳለው በጥናቱ ተዳስሷል፡፡

በመምህር ግዛቸው ጥጋብ በኩል “የብራና ፅሁፍ አጀማመር እና ታሪካዊ ዕድገት” የፅሁፍ ኪህን ጥበብ ከቦታ ቦታ ልዩነት ፣የብዕር አዘገጃጀት እና አጠቃቀም፣የብራና ቆዳ አዘገጃጀት ሂደት፣የቀለም ዓይነቶች አዘገጃጀት በሚሉ ይዘቶች ፅሁፍ ቀርቦ ሰፊ ውይይት ተደርጓል፡፡

ከአማርኛ እና ከግዕዝ ቋንቋዎች የቅኔ ልዩነት፣ከግዕዝ ቋንቋ የተለየ ሚስጥራዊነት፣የብራና ፅሁፍን እና ድጅታላይዜሽንን ማስታርቅ ስለሚቻልበት ሁነታ፣ስለቁም ፅህፈት ምንነት፣የአባቶችን ሙያ ማስቀጠል ስለሚቻልበት ሁኔታ፣ስለግዕዝ ቋንቋ ስልጠና አጀማመር ከተሳታፊዊች ሀሳብ እና አስተያየቶች ተሰጥተዋል፡፡

ታህሳስ 25/2017 ዓ.ም

የህዝብና አለም አቀፍ ግንኙነት ስራ አስፈፃሚ